रौतहट सीमाबाट भारततर्फ लैजाँदै गरेको ८५५ किलो युरिया मल, ५० किलो खैनी र चार साइकलसहित दुई नेपाली पक्राउ परेका छन्। भारतीय सशस्त्र सीमा बल (एसएसबी) ले उनीहरूलाई नियन्त्रणमा लिएको हो।
पूर्वी चम्पारण जिल्लाको अगरवा क्षेत्रमा ७१औँ वाहिनी एसएसबीले शुक्रबार साँझ बाराका आदित्य नारायण मुखिया र अमिरखा मुखियालाई नियन्त्रणमा लिएको हो। उनीहरू नानसागरा घाटका बासिन्दा हुन्। सीमा स्तम्भ नम्बर ३६० बाट करिब २०० मिटर भारततर्फ उनीहरूलाई पक्राउ गरिएको थियो।
बरामद ८५५ किलो युरिया १९ बोरामा थियो, प्रत्येक बोरा ४५ किलोको थियो।
यस्तै, बडहरवा बोर्डरमा एसएसबीले २४ बोरा युरिया मल, एक मोटरसाइकल र चार साइकल बरामद गरेको छ। सुरक्षाकर्मी देखेपछि तस्कर भागेका थिए। पीछा गर्ने क्रममा भारतीय नागरिक गोपाल राय पक्राउ परे।
पक्राउ परेका व्यक्ति र बरामद सामग्री सीमा शुल्क कार्यालय मोतिहारीमा बुझाइएको छ। सीमामा अवैध ओसारपसार बढेपछि एसएसबीले निगरानी कडा पारेको छ।
