ओडिआई मान्यता जोगाउने निर्णायक लडाइँमा नेपाल आज कीर्तिपुरस्थित त्रिवि अन्तर्राष्ट्रिय क्रिकेट रंगशालामा स्कटल्यान्डसँग भिड्दैछ। खेल बिहान ९:३० बजे सुरु हुनेछ।
यस शृंखलाको अघिल्लो खेलमा नेपाल स्कटल्यान्डसँग दुई रनले पराजित भएको थियो। त्यसपछि नेपालले अमेरिकालाई ९ विकेटले हराएको थियो।
लिग–२ को तालिकामा स्कटल्यान्ड ३० खेलबाट ३८ अंकसहित शीर्ष स्थानमा छ। नेपाल भने २६ खेलमा २० अंक जोडेर आठ राष्ट्र सम्मिलित तालिकाको सातौँ स्थानमा छ।
नेपालले विश्वकपको ग्लोबल क्वालिफायरमा छनोट हुन अब बाँकी सबै १० वटा खेल जित्नुपर्छ। साथै, एकदिवसीय मान्यता जोगाउन शीर्ष छ स्थानमा रहनु आवश्यक छ।
लिग–२ का शीर्ष चार टोली सोझै विश्वकप छनोटमा पुग्ने भएकाले नेपालका लागि अबका हरेक खेल ‘गर या मर’ को स्थितिमा छन्।
