काठमाडौं । बाढी प्रभावित क्षेत्रमा खोज तथा उद्धार कार्यलाई थप प्रभावकारी बनाउन नेपाल सरकारले अन्तर्राष्ट्रिय समुदायसँग अत्यावश्यक उपकरण तथा सामग्री सहयोग मागेको छ । राष्ट्रिय विपद् जोखिम न्यूनीकरण तथा व्यवस्थापन प्राधिकरणसहितका सरकारी निकायसँगको समन्वयमा सामग्री पहिचान गरी सहयोग मागिएको हो ।
परराष्ट्र मन्त्रालयले अन्तर्राष्ट्रिय साझेदारलाई आवश्यक सामग्रीका लागि औपचारिक रूपमा पत्राचार गरिसकेको छ । उद्धार तथा प्रतिकार्यलाई सुदृढ बनाउन सहयोग समयमै परिचालन गर्न समन्वय भइरहेको मन्त्रालयले जनाएको छ ।
नेपालले माग गरेका सामग्रीमा उच्च क्षमताका बेली ब्रिज, महामारी रोकथामका सामग्री, डीएनए परीक्षण किट, पानीमुनि चल्ने ड्रोन, पोर्टेबल जेनरेटर, उच्च क्षमताका सर्ज पम्प, प्रयोगशालाका फ्रिजर तथा हिलो र सुरुङ उद्धारका लागि आवश्यक पोसाक लगायत छन् ।
