काठमाडौंको विशेष अदालतले नेपाल टेलिकमको बिलिङ प्रणाली भ्रष्टाचार मुद्दामा तत्कालीन प्रबन्ध निर्देशक सुनिल पौडेलसहित १८ जनालाई सफाइ दिएको छ।
विशेष अदालतका न्यायाधीशद्वय नारायणप्रसाद पौडेल र विदुर कोइरालाको इजलासले बिहीबार सबै आरोपीलाई निर्दोष ठहर गर्दै सफाइ दियो।
सफाइ पाउनेहरूमा तत्कालीन प्रबन्ध निर्देशक पौडेल, तत्कालीन प्रमुख व्यावसायिक अधिकृत संगीता अर्याल, प्रतिभा वैध र राजेन्द्र श्रेष्ठ लगायत १८ जना छन्। अख्तियार दुरुपयोग अनुसन्धान आयोगले उनीहरूविरुद्ध ३३ करोड ४८ लाख १७ हजार ४३० रुपैयाँ बिगो दाबी गर्दै मुद्दा दायर गरेको थियो।
अख्तियारले नेपाल टेलिकमको बिलिङ सिस्टम अपग्रेड गर्ने कार्यमा ठूलो आर्थिक अनियमितता र मिलेमतो भएको दाबी गरेको थियो। तत्कालीन प्रबन्ध निर्देशक पौडेलसहितका प्रतिवादीहरूले पदको दुरुपयोग गरी राज्यकोषमा ठूलो नोक्सानी पुर्याएको अख्तियारको आरोप थियो।
अदालतले अख्तियारको दाबी नपुग्ने ठहर गर्दै सबै प्रतिवादीलाई निर्दोष सावित गर्यो। यस मुद्दामा सन् २०११ को मूल सम्झौता र मर्मतसम्भार सम्झौताहरूमा अनियमितताको आरोप थियो।
