महोत्तरीको बर्दिवासका १६ कामदार भारतको हरियाणामा बन्धक बनाइएका छन्। उनीहरूलाई जिन जिल्लाको झाझर थानाअन्तर्गत हेलन गाउँको कुखुरा फार्ममा काम गर्ने क्रममा बन्धक बनाइएको हो।
गत चैत १३ गते बर्दिवास–३ गौरीडाँडाका दिलीप परियारले आकर्षक तलब, सेवा सुविधा र हलुको कामको प्रलोभन देखाएर उनीहरूलाई भारत लगेका थिए। भारत पुगेपछि डरधाक, यातना र ज्याला नदिई बन्धक बनाएको पीडितहरूले बताएका छन्।
बन्धक बनाइएकी २० वर्षीया किरण सदाले फोनमार्फत प्रहरीलाई यातना र ज्याला नदिएको जानकारी दिइन्।
बर्दिवास–१४ मुसहर बस्तीका वीरेन्द्र सदा, कारिचरण सदा, अशोक सदा, अमरलाल सदा र मनोहर सदाले नयाँ दिल्लीस्थित नेपाली दूतावाससँग समन्वय गरी उद्धारका लागि प्रहरी नायब उपरीक्षक गुरुप्रसाद तिमिल्सिनासमार्फत निवेदन दिएका छन्।
प्रहरीका अनुसार बन्धक बनाइएकाहरूमा मुकेश (१७), किसन (१६), आशिक (१३), अमृत (२१), किरण (२०), झरी (३५), लालमुनी (३४), काजल (१६), साजन (१३), शङ्कर सदा (९), विसुनदेव (३८), महावती (३५), अमृत (१०), मोहन (४०) र बेचो सदा (३५) छन्।
