नेपालगन्ज उपमहानगरपालिका-२१ फुल्टेक्रास्थित एभरेष्ट प्लाइ ढोका उद्योगमा शुक्रबार दिउँसो आगलागी हुँदा पाँच करोड रुपैयाँ बराबरको क्षति भएको छ। शनिबार मात्र नियन्त्रणमा आएको आगोले उद्योगका सम्पूर्ण मेसिन, कच्चा पदार्थ र तयारी ढोका जलेर नष्ट भएका छन्।
उद्योग सञ्चालक प्रकाश रानाका अनुसार आगलागीबाट मेसिनरी, कच्चा पदार्थ र तयारी ढोका पूर्ण रूपमा जलेका छन्। विद्युत् सर्ट भएर आगलागी भएको अनुमान छ।
जिल्ला प्रहरी कार्यालय बाँकेका प्रहरी नायब उपरीक्षक प्रतितसिंह राठौरले शुक्रबार दिउँसो सुरु भएको आगो निभाउन शनिबारसम्म प्रयास गरिएको बताए। बाँके र बर्दियाका बारुणयन्त्र, सेना, प्रहरी, सशस्त्र प्रहरी बल र स्थानीयवासीको प्रयासमा आगो नियन्त्रणमा आएको थियो।
आगलागीको कारण र क्षतिको पूर्ण विवरण संकलन भइरहेको प्रहरीले जनाएको छ।
