रसुवाको उत्तरगया गाउँपालिका–५ स्थित बेत्रावती बजारबाट दुई दिनको अवधिमा ५७ हजार अमेरिकी डलरसहित दुई जना पक्राउ परेका छन्। पक्राउ पर्नेहरू पर्यटक गाइडको रूपमा काम गर्दै आएका थिए।
आइतबार एक यात्रुवाहक बस जाँच गर्दा प्रहरीले धादिङ गंगाजमुना गाउँपालिका–५ का सुशील गुरुङलाई ४३ हजार अमेरिकी डलरसहित नियन्त्रणमा लिएको थियो। गुरुङ काठमाडौंबाट टिमुरतर्फ जाँदै थिए।
सोमबार पनि सोही बजारबाट काठमाडौंबाट टिमुरतर्फ जाँदै गरेका ओखलढुंगाका मीनबहादुर मगरलाई १४ हजार पाँच सय अमेरिकी डलरसहित प्रहरीले पक्राउ गरेको छ।
जिल्ला प्रहरी कार्यालय रसुवाका प्रवक्ता एवं प्रहरी निरीक्षक राजु शाहका अनुसार पक्राउ परेका दुवै व्यक्तिसँग डलरको स्रोत खुल्ने कागजात नभएकाले थप अनुसन्धानका लागि राजस्व अनुसन्धान कार्यालयमा बुझाइएको छ।
