बाराको निजगढ नगरपालिका-१ गोरु बजारमा ५० वर्षीय धनबहादुर घिमिरेको दाउ प्रहारबाट ४० वर्षीय मानबहादुर योन्जन गम्भीर घाइते भएका छन्।
जिल्ला प्रहरी कार्यालय बाराका अनुसार सोमबार दिउँसो करिब १२ बजे घिमिरे र योन्जनबीच सामान्य भनाभन सुरु भएको थियो।
भनाभन चर्किएपछि घिमिरेले मासु काट्न प्रयोग गरिने दाउले योन्जनमाथि प्रहार गरे। दाउ प्रहारबाट योन्जनको टाउको र गर्दनमा गम्भीर चोट लागेको छ।
घाइते योन्जनको मध्यम सिटी अस्पताल, निजगढमा उपचार भइरहेको प्रहरीले जनाएको छ।
घटनाको सूचना पाउनासाथ इलाका प्रहरी कार्यालय निजगढबाट प्रहरी निरीक्षक दाताराम अधिकारीको नेतृत्वमा पाँच सदस्यीय टोली घटनास्थल पुग्यो। अस्थायी प्रहरी पोस्ट सिगोलबाट असई मनोज तिवारीको नेतृत्वमा दुई सदस्यीय टोली पनि घटनास्थलमा खटिएको थियो।
प्रहरीले घटनालगत्तै आरोपित धनबहादुर घिमिरेलाई नियन्त्रणमा लिएको छ। उनीमाथि इलाका प्रहरी कार्यालय निजगढको हिरासतमा राखी थप अनुसन्धान भइरहेको छ।
