बाराको निजगढस्थित एक होटलमा २५ वर्षीया युवतीको शंकास्पद मृत्यु भएको छ।
निजगढ नगरपालिका–९ बुद्धचोकमा रहेको गुरुङ होटलको कोठामा निजगढ–१२ की सीता थिङ घाइते अवस्थामा फेला परेकी थिइन्। वैशाख २५ गते राति करिब १० बजेको समयमा उनलाई निजगढ सामुदायिक अस्पताल पुर्याइए पनि चिकित्सकले मृत घोषणा गरेका थिए। प्रहरीको प्रारम्भिक अनुसन्धानले युवतीको घाँटी थिचेर हत्या गरिएको हुन सक्ने देखाएको छ।
घटनाको समयमा मृतक थिङसँगै सोही कोठामा निजगढ–९ की १८ वर्षीया अनु सुनार रहेको प्रहरीले जनाएको छ। उनीहरूसँगै आएका जितपुर सिमरा उपमहानगरपालिका–१६ टाँगिया बस्तीका ३५ वर्षीय महेश माझी र ३६ वर्षीय सुनिल बोम्जन भने घटनालगत्तै फरार भएका थिए। प्रहरीले राति १ बजे सुनिल बोम्जनलाई टाँगिया बस्ती नजिकैको जंगल छेउबाट र महेश माझीलाई राति ४ बजे निजगढ–७ माझीटोलबाट नियन्त्रणमा लिएको छ।
जिल्ला प्रहरी कार्यालय बाराका प्रवक्ता एवं प्रहरी नायब उपरीक्षक विजयराज पण्डितले पक्राउ परेका दुवै जनालाई नियन्त्रणमा लिएर घटनाबारे थप अनुसन्धान प्रक्रिया अगाडि बढाइएको जानकारी दिएका छन्। मृतकको शव निजगढ सामुदायिक अस्पतालमा राखिएको छ। युवतीको उमेरबारे स्रोतहरूमा २५ र १९ वर्ष उल्लेख छ।
