चिकित्सा विज्ञान राष्ट्रिय प्रतिष्ठान (न्याम्स) ले भक्तपुरको दुवाकोटस्थित सरकारी जग्गा ६ दिनभित्र खाली गर्न नेपाल इन्जिनियरिङ कलेजलाई अल्टिमेटम दिएको छ। वीर अस्पतालको विस्तारित परियोजनाअन्तर्गत विशिष्टीकृत अस्पतालको भौतिक संरचना निर्माण प्रक्रिया अघि बढाउन प्रतिष्ठानले कलेजलाई पत्राचार गर्दै जग्गा खाली गर्न निर्देशन दिएको हो।
सहरी विकास तथा भवन निर्माण विभाग र गुरु मेटल-गोकर्ण जेभीबीच सो स्थानमा भवन निर्माणका लागि ठेक्का सम्झौता भइसकेको छ। निर्माण कार्य तत्काल सुरु गर्नुपर्ने प्रतिष्ठानले जनाएको छ। न्याम्सले आफ्नै भौतिक संरचना निर्माणका लागि जग्गा उपलब्ध गराउन कलेजलाई ताकेता गरेको हो।
स्वास्थ्य मन्त्रालयले २०८३ वैशाख ३० गते सरकारी जग्गा संरक्षण गरी आफ्नै भौतिक संरचना निर्माण गर्न निर्देशन दिएको थियो। सोही निर्देशनअनुसार यो कदम चालिएको प्रतिष्ठानले बताएको छ। विगत तीन वर्षदेखि जग्गा खाली गरिदिन पटक-पटक पत्राचार गरिए पनि कलेजले अटेर गरेको न्याम्सको दाबी छ।
सरकारले सात वर्षअघि नै दुवाकोटमा १५ सय शय्याको अत्याधुनिक र विशिष्टीकृत अस्पताल निर्माण गर्ने घोषणा गरेको थियो। लामो समयदेखि जग्गा विवादमा अल्झिएको यो परियोजना अब ठेक्का सम्झौता भई निर्माणको चरणमा प्रवेश गरेको छ। सोही कारण न्याम्सले जग्गा खाली गराउन लागेको हो।
