नेकपा एमालेका अध्यक्ष तथा पूर्वप्रधानमन्त्री केपी शर्मा ओलीले देश गम्भीर अवस्थामा पुगेको दाबी गर्दै तिहार र छठ पर्वलगत्तै राज्यसत्ताविरुद्ध नयाँ आन्दोलनका लागि सडकमा उत्रिन आफ्ना नेता तथा कार्यकर्ताहरूलाई निर्देशन दिएका छन्। उनले अहिलेदेखि नै मानसिक रूपमा तयारी अवस्थामा रहन कार्यकर्तालाई आग्रह गरे।
बुधबार पार्टी केन्द्रीय कार्यालय च्यासलमा मनोनीत केन्द्रीय सदस्यहरूको शपथ ग्रहण कार्यक्रमलाई सम्बोधन गर्दै अध्यक्ष ओलीले आन्दोलनबाट पछि हटेर अब देशको रक्षा गर्न नसकिने बताए।
सरकार र प्रहरीमाथि ओलीको गम्भीर आरोप
सम्बोधनका क्रममा ओलीले वर्तमान सरकार ‘फाँसीवाद’ तर्फ बेलगाम अघि बढिरहेको र सिंगो राज्य निरीह अवस्थामा पुगेको आरोप लगाए। उनले प्रहरी प्रशासनको पछिल्लो कार्यशैलीमाथि कडा आक्रोश पोख्दै प्रहरीले बिना बर्दी ‘गुण्डा’ शैलीमा नागरिकलाई आतंकित पारेको दाबी गरे।
‘बोल्यो कि त पुर्जी, बोल्यो कि त गिरफ्तारी गर्ने गरी आतंकको राज सिर्जना गरिएको छ,’ ओलीले भने, ‘पुलिससँग ड्रेस छैन ? आवारा हो पुलिस ? गुण्डा हो ? बिना बर्दी जाने, बलजफ्ती गरेर ढोका खोल्न लगाउने, ढोका फोरेर भित्र पस्ने ?’ उनले सरकारले शान्ति र लोकतन्त्रको कुरा गरे पनि व्यवहारमा षड्यन्त्र र आतंक फैलाइरहेको जिकिर गरे।
चुनावी रणनीति र आक्रामक सडक यात्रा
आगामी स्थानीय र प्रदेश तहको निर्वाचनलाई लक्षित गर्दै ओलीले विरोधीहरूको ‘एमालेबिनाको देश बनाउने’ योजनालाई दिवा स्वप्नमा परिणत गरिदिन कार्यकर्तालाई निर्देशन दिएका छन्।
NmKhabar राजनीतिक विश्लेषण अनुसार, विगतमा सत्तामा रहँदा सडक आन्दोलनको कडा आलोचना गर्ने ओली अहिले आफैँ सडक संघर्षको वकालत गरिरहेका छन्। यो अभिव्यक्तिले एमाले अब आक्रामक सडक रणनीतितर्फ अघि बढिरहेको संकेत गर्दछ।
एकातिर आफ्ना कार्यकर्तालाई चुनावसम्म सक्रिय राख्ने र अर्कोतिर सरकारको कदमविरुद्ध दबाब बढाउने दोहोरो रणनीतिका साथ ओलीले ‘आन्दोलन’ लाई प्रमुख हतियार बनाउन खोजेको देखिन्छ। सत्ता बाहिर पुगेपछि राज्यको कार्यशैलीविरुद्ध सडक संघर्षलाई नै शक्तिको स्रोत मान्ने राजनीतिक संस्कारलाई एमालेले पनि अब जोडतोडका साथ अपनाउन थालेको प्रस्ट हुन्छ।
