पाल्पामा हालसम्म ८४२ जनामा ह्युमन इम्युनोडेफिसिएन्सी भाइरस (एचआइभी) सङ्क्रमण पुष्टि भएको छ। जिल्ला स्वास्थ्य कार्यालयका क्षयकुष्ट रोग अधिकृत विश्वनाथ न्यौपानेका अनुसार ३५४ जनाले नियमित एन्टिरिट्रोभाइरल थेरापी (एआरटी) औषधि सेवन गरिरहेका छन्।
पाल्पा र रामपुर अस्पतालका एआरटी सेन्टरबाट सङ्क्रमितहरूले औषधि लिइरहेका छन्। औषधि सेवन गर्ने १२ जना बालबालिका छन्। गत आर्थिक वर्षमा पाँच जना सङ्क्रमितको मृत्यु भएको थियो।
अपमान, भेदभाव र लाञ्छनाको डरले अझै पनि केही सङ्क्रमित समाजमा खुल्न नसकेको न्यौपाने बताउँछन्। नेपालमा सुई प्रयोग गर्ने लागूऔषध प्रयोगकर्ता, यौनकर्मी, समलिङ्गी पुरुष, तेस्रोलिङ्गी र विदेशिनेहरू एचआइभीको उच्च जोखिममा छन्।
स्वास्थ्य कार्यालय पाल्पाले सचेतना फैलाउन जनप्रतिनिधि, पत्रकार, प्रहरी र जोखिम समूहसँग अभिमुखीकरण कार्यक्रम गर्यो। कार्यक्रम सहभागीले चिकित्सकको सल्लाहमा नियमित औषधि सेवन गर्नुपर्नेमा जोड दिए।
समयमै औषधि सेवनले भाइरस नियन्त्रणमा राख्छ। यसले रोग प्रतिरोधात्मक क्षमता बढाउँछ। स्वस्थ जीवनयापन सहज बनाउँछ। सङ्क्रमितले एआरटी नियमित सेवन गरे भाइरसको मात्रा न्यून रहन्छ, न्यौपानेले बताए।
औषधि सेवनमा लापरबाहीले स्वास्थ्य अवस्था जटिल बन्न सक्ने सरोकारवालाले सचेत गराए। जिल्ला स्वास्थ्य कार्यालय प्रमुख टुकप्रसाद पोखरेलले नियमित स्वास्थ्य परीक्षण, सन्तुलित आहार र स्वस्थ जीवनशैली अपनाउन सुझाव दिए।
नेपाल परिवार नियोजन सङ्घ पाल्पाका प्रबन्धक शोवाकान्त न्यौपानेले सङ्क्रमितले नकारात्मक सोच नराखी सेवा, शिक्षा, स्वास्थ्य र रोजगारीबाट वञ्चित नहुनुपर्ने बताए। प्रतिबद्ध समूहकी प्रबन्धक अस्मिता भण्डारीले सङ्क्रमित समाजको त्रासले खुल्न नसकेको बताइन्। सचेतना विकास गरी सुरक्षित वातावरण सुनिश्चित गर्न सहकार्य आवश्यक छ।
