पाँचथरको याङवरक गाउँपालिकामा शुक्रबार राति बाढीपहिरोले दुई घर र तीन झोलुङ्गे पुल बगाएको छ। वडा नं १, २ र ३ मा घरगोठ, सडक र जलविद्युत् आयोजनामा क्षति पुगेको छ।
गाउँपालिकाका उपाध्यक्ष बाबा मेन्याङ्बोका अनुसार हालसम्म दुई घर र तीन झोलुङ्गे पुल बगेका छन्। मानवीय क्षति नभएको र वर्षा रोकिएको Nmkhabarलाई स्रोतले पुष्टि गर्यो।
बाढीपहिरोले याङवरक–१ च्याङथापु बजार आसपासको क्षेत्रमा असर पारेको छ। मध्यपहाडी लोकमार्गको ओयाम–चिवाभञ्ज्याङ खण्ड पूर्ण रूपमा अवरुद्ध छ। याङवरक–३ को रिजाल भिरमा पहिरो झरेको छ। वडा नं २ को दोभानेमा रहेको डाइभर्सन बगाएको छ।
जिल्ला प्रहरी कार्यालय पाँचथरका प्रमुख प्रहरी नायब उपरीक्षक अनिषकुमार कर्णले मध्यपहाडी लोकमार्ग सुचारु गराउने पहल भइरहेको बताए। सीमा प्रहरी कार्यालय च्याङथापुले क्षतिको विवरण संकलन गरिरहेको छ।
पाँचथरको हिलिहाङ गाउँपालिका र ताप्लेजुङको आठराई त्रिवेणी गाउँपालिकाको सीमामा पर्ने तमोर कोरिडोरमा निर्माणाधीन लिम्बुनी सडक पुलको ट्रस बाढीले बगाएको प्रहरीले जनाएको छ। हेंवा, काबेली र तमोर नदीमा आएको बाढीले तटीय क्षेत्र जोखिमपूर्ण बनेको छ।
याङवरक–३ ओयाम बजार आसपासको खेतीयोग्य जमिनमा पनि बाढीपहिरोले क्षति पुर्याएको स्थानीयवासी तेजबहादुर योङ्याले बताए।
