पाँचथरको माझीटारमा बाढीले बगाएको सिँचाइ कुलो चार वर्षदेखि पुनर्निर्माण नहुँदा ४१ घरधुरीको खेतीयोग्य जमिन बाँझो बनेको छ, जसले जीविकोपार्जनमा गम्भीर संकट निम्त्याएको छ।
फिदिम नगरपालिका–४ र हिलिहाङ गाउँपालिका–७ को सीमामा पर्ने माझीटारको समथर खेतीयोग्य जमिनमा मकैबाहेक अन्य खेती हुन छाडेको छ। २०८० असार ३ गते आएको बाढीले हेंवाखोलाबाट माझीटारमा ल्याइएका दुई सिँचाइ कुलो पूर्ण क्षतिग्रस्त बनाएको थियो।
बाढीले खोलाको मुहान गहिरो बनाएपछि फिदिम र हिलिहाङ दुवैतर्फका कुलो बन्द भए। यसकारण विगत चार वर्षदेखि धान, सागसब्जी, नगदेबाली र फलफूलखेती हुन नसकेको फिदिम–४ की मीना माझीले बताइन्।
माझीटारमा माझी र तामाङ समुदायका ४१ घरधुरीको बसोबास छ। यसका अतिरिक्त बाहिरबाट आएर राजमार्गमा आधारित होटल सञ्चालन पनि भइरहेका छन्। हिलिहाङ गाउँ कार्यपालिकाका सदस्य वीरेन्द्र मङ्ग्रातीले विपद् प्रभावित योजना पुनर्निर्माण र सहयोगका लागि बजेट अभाव रहेको बताए।
