काठमाडौं- प्रतिनिधिसभाले चार विधेयकमा राष्ट्रियसभाबाट प्राप्त संशोधन स्वीकृत गरेको छ। बिहीबारको बैठकले सार्वजनिक खरिद (दोस्रो संशोधन) विधेयक, २०८३, सम्पत्ति शुद्धीकरण (मनि लाउन्डरिङ) निवारण (तेस्रो संशोधन) विधेयक, २०८३, सहकारी (पहिलो संशोधन) विधेयक, २०८३ र स्वास्थ्य विज्ञान प्रतिष्ठानसम्बन्धी केही नेपाल ऐनलाई संशोधन गर्ने विधेयक, २०८३ माथिका संशोधनहरूलाई अनुमोदन गरेको हो।
कानुनमन्त्री सोविता गौतमले प्रस्तुत गरेको सार्वजनिक खरिद विधेयकसम्बन्धी संशोधन प्रस्ताव सर्वसम्मतिले पारित भयो। अर्थमन्त्री डा. स्वर्णिम वाग्लेले पेश गरेको सम्पत्ति शुद्धीकरण विधेयकको संशोधन पनि सर्वसम्मतिमै स्वीकृत भयो।
भूमि व्यवस्था, सहकारीमन्त्री प्रतिभा रावलले प्रस्तुत गरेको सहकारी विधेयकको संशोधन भने बहुमतले स्वीकृत भएको छ। सांसद पार्वती विकको प्रश्नको जवाफमा मन्त्री रावलले कार्यान्वयनका समस्या समाधान गर्न व्यापक छलफलपछि संशोधन ल्याइएको बताइन्।
स्वास्थ्यमन्त्री निशा मेहताले प्रस्तुत गरेको स्वास्थ्य विज्ञान प्रतिष्ठानसम्बन्धी विधेयकको संशोधन पनि सर्वसम्मतिले स्वीकृत भएको छ। प्रतिनिधिसभाको अर्को बैठक असार २६ गते शुक्रबार दिउँसो १ बजे बस्नेछ।
