प्रतिनिधिसभा बैठकमा आज विनियोजन विधेयक, २०८३ अन्तर्गत आठ मन्त्रालयको बजेट शीर्षकमाथिको छलफल सकिने तयारी छ। बिहान ११ बजे बस्ने बैठकमा विज्ञान, प्रविधि तथा नवप्रवर्तन, कानुन, पुर्वाधार विकास, गृह, उर्जा, परराष्ट्र, अर्थ, र रक्षामन्त्रालयका साथै प्रधानमन्त्री तथा मन्त्रिपरिषदको कार्यालय, राष्ट्रिय योजना आयोगको सचिवालय, राष्ट्रपति र उपराष्ट्रपति कार्यालयको बजेटमाथि छलफल हुनेछ।
हिजो नौ मन्त्रालयका विनियोजन शीर्षकमाथिको छलफल पूरा भएको थियो। आजको बैठकमा १२ जना सांसदले खर्च कटौती प्रस्ताव पेश गर्ने कार्यसूची छ। यसका साथै प्रतिनिधिसभाका पूर्व सदस्य मंगलप्रसाद गुप्ताको निधनमा शोक प्रस्ताव पारित गरिनेछ।
यसैबीच, आज ६ वटा संसदीय समितिको बैठक पनि बस्दैछ। अर्थ, पूर्वाधार विकास, आर्थिक मामिला सुशासन समिति, विधायन व्यवस्थापन समिति, सार्वजनिक नीति तथा प्रत्यायोजित र संघीयता सबलीकरण तथा राष्ट्रिय सरोकार समितिको बैठक तय भएको संसद सचिवालयले जनाएको छ।
