निर्माणाधीन संसद् भवनको अवलोकन गर्दै सभामुख डोलप्रसाद अर्यालले निर्माण कम्पनीलाई निर्धारित समयमा काम सम्पन्न नभए दैनिक एक करोड रुपैयाँ जरिवाना गर्ने चेतावनी दिएका छन्। अर्यालले निर्माण व्यवसायीहरूसँगको छलफलमा विभिन्न बहानामा कामको म्याद सार्दै आएको भन्दै आक्रोश व्यक्त गरे।
सभामुख अर्यालले काम सम्पन्न गर्ने एक निश्चित मिति तोक्न र सो मितिमा काम नभए कारबाहीस्वरूप जरिवाना गरिने प्रस्ताव राखे। उनले निर्माण कार्यमा कुनै पनि बहानामा ढिलाइ नगर्न निर्देशन दिए।
सभामुख अर्यालले भौतिक पूर्वाधार मन्त्री र सचिवलाई तत्काल बैठक बसी यस विषयमा ठोस कदम चाल्न सुझाव दिएका छन्।
