किसानको भुक्तानी १५ दिनभित्र अनिवार्य गर्न माग
राष्ट्रिय स्वतन्त्र पार्टी (रास्वपा) की सांसद लिमा अधिकारीले किसानहरूको भुक्तानी १५ दिनभित्र अनिवार्य हुने गरी कानुनी व्यवस्था गर्न सरकारसँग माग गरेकी छन्। बिहीबार प्रतिनिधि सभा बैठकमा बोल्दै उनले उखु र दुग्ध किसानको भुक्तानी वर्षौंसम्म नभएको दृष्टान्त पेस गरिन्। किसानको पसिनाको मूल्य दिन हिच्किचाउने कार्यले मुलुक समृद्ध नहुने अधिकारीले बताइन्।
सदनमा संख्याको दम्भ नदेखाउन चेतावनी
नेपाली कांग्रेसका सचेतक एवं सांसद निश्कल राईले संसद्मा संख्याको दम्भ नदेखाउन चेतावनी दिए। प्रधानमन्त्रीलाई सदनमा उपस्थित गराउन नसकेको भन्दै उनले सरकारको जवाफदेहीतामाथि प्रश्न उठाए। सचेतक राईले सभामुखले हर्कको व्यवहारप्रति प्रश्न उठाएकोमा असन्तुष्टि जनाए।
बाँदर आतंक नियन्त्रणमा ७ दिने अल्टिमेटम
सांसद राजेन्द्रकुमार राईले बाँदर आतंक नियन्त्रणका लागि सरकारलाई सात दिनको अल्टिमेटम दिए। बिहीबारको प्रतिनिधि सभा बैठकको शून्य समयमा बोल्दै राईले सात दिनभित्र बाँदर समस्या समाधानको योजना नआए सदन चल्न नदिने चेतावनी दिए। धनकुटाबाट आएको गुनासो सुनाउँदै उनले बाँदरले लुगा र भात खानसमेत नदिएको उल्लेख गरे। सयौं परिवारको उठिबास लगाउँदा पनि सरकार गम्भीर नभएको भन्दै राईले असन्तुष्टि व्यक्त गरे।
