पर्सा प्रहरीले पटेर्वासुगौलीमा दुई राउन्ड हवाई फायर गरी ३३ किलो गाँजासहित तीन जना तस्करलाई पक्राउ गरेको छ। आइतबार राति मलाही टोलमा भएको यो कारबाहीले अवैध कारोबारमाथि अंकुश लगाएको छ।
प्रहरीले नन्दलाल सहनी, महेश सहनी र भुटी सहनीलाई नियन्त्रणमा लिएको हो। पटेर्वासुगौली गाउँपालिका–१ मा गाँजा कारोबार भइरहेको सूचना पाएपछि प्रहरी टोली पुगेको थियो।
प्रहरी जाँच गर्न पुग्दा उनीहरू गाँजा बोकेर भाग्न थाले। नियन्त्रणमा लिन खोज्दा प्रहरीले दुई राउन्ड हवाई फायर गरेको पर्सा प्रहरी प्रवक्ता डिएसपी चक्रबहादुर मल्लले बताए।
प्रहरीले उनीहरूको साथबाट ३३ किलो गाँजा बरामद गरेको छ। पक्राउ परेका तीनै जनालाई हिरासतमा राखी थप अनुसन्धान अगाडि बढाइएको छ।
