पर्साको पकहामैनपुर गाउँपालिका–१ धोरे–सिधौलिया सीमामा धान रोपिरहेका सात महिला बिहीबार चट्याङ लागेर घाइते भएका छन्। वर्षासँगै आएको चट्याङले उनीहरूलाई असर गरेको हो। प्रहरीका अनुसार घाइते हुनेमा ५५ वर्षीया शान्तिदेवी सहनी, ५५ वर्षीया राधिका देवी सहनी, ५५ वर्षीया रिता देवी सहनी, ५२ वर्षीया कुश्मी देवी सहनी, ४२ वर्षीया सन्ध्या देवी, ३५ वर्षीया प्रमिला सहनी र ३५ वर्षीया संगीता देवी छन्।
घाइतेमध्ये शान्तिदेवी सहनीको स्थानीय अस्पतालमा उपचार भइरहेको छ। उनको स्वास्थ्य अवस्था सामान्य छ। अन्य छ जनाको भारतको रक्सौलस्थित डंकन अस्पतालमा उपचार भइरहेको छ। उपचाररत कुश्मी देवी सहनीको अवस्था गम्भीर छ। बाँकी पाँच जनाको अवस्था मध्यम रहेको प्रहरीले जनाएको छ।
