पोखराका विभिन्न वडामा सोमबार आएको हावाहुरीसहितको असिना पानीले मकै, फलफूल तथा तरकारी बालीमा व्यापक क्षति पुर्याएको छ।
पोखरा महानगरपालिकाका वडा नं १३, २२, २३, २४, २८, ३१, ३२, ३३ लगायतका क्षेत्रमा लगाइएका बालीनालीमा क्षतिको विवरण संकलन भइरहेको पोखरा महानगरपालिका कृषि विकास शाखाका प्रमुख मनहर कडरियाले जानकारी दिए।
वडा नं १३ मा करिब २०० रोपनी क्षेत्रफलमा लगाइएको तरबुजाको खेती असिनाले पूर्ण रूपमा क्षति पुर्याएको छ।
वडा नं ३३ को सुरौदी तिखेढुङ्गा क्षेत्रमा सुरौदी खोलामा पानीको बहाव बढेका कारण पुल नहुँदा ३५ रोपनीभन्दा बढी क्षेत्रफलमा लगाइएको तरबुजा बजारसम्म पुर्याउन किसानहरूलाई समस्या भएको छ।
