पोखरा महानगरपालिका–१८ अँधेरीकुनामा घरको जग खन्ने क्रममा माटोको ढिस्को खस्दा बिहीबार दुई मजदुरको मृत्यु भएको छ। करिब ७ फिट गहिरो खाल्डोमा काम गरिरहेका बेला अचानक माटो खसेर उनीहरू पुरिएका थिए।
मृत्यु हुनेमा पर्वतको महाशिला गाउँपालिका–६ फलामखानीका २९ वर्षीय विक्रम सुनार र गोरखाको पालुङटार नगरपालिका–७ का ३७ वर्षीय राजु कुमाल रहेका छन्। माटोमा पुरिएर घाइते भएका दुवैलाई उद्धार गरी मणिपाल शिक्षण अस्पताल लगिएको थियो।
उपचारका क्रममा चिकित्सकले दुवैलाई मृत घोषणा गरेको जिल्ला प्रहरी कार्यालय कास्कीका प्रहरी निरीक्षक दीपकप्रसाद रिजालले बताए। रिजालका अनुसार, सुनारलाई अपराह्न ४:३५ बजे उद्धार गरी ५:०० बजे मृत घोषणा गरिएको थियो भने कुमाललाई साँझ ६:०० बजे उद्धार गरी ६:२६ बजे मृत घोषणा गरियो।
घटनाको जानकारी पाएलगत्तै नेपाल प्रहरी, सशस्त्र प्रहरी र स्थानीयवासीको संयुक्त टोलीले उद्धार कार्य सुरु गरेको थियो। जिल्ला प्रहरी कार्यालय कास्कीबाट प्रहरी निरीक्षक रिजालको कमान्डमा १० जना, वडा प्रहरी कार्यालय बगरबाट प्रहरी निरीक्षक रामप्रसाद सापकोटाको कमान्डमा सात जना तथा सशस्त्र प्रहरी बल नेपाल नं २४ हेडक्वाटर कालिका गण पोखराबाट सशस्त्र प्रहरी सहायक निरीक्षक सुजतकुमार यादवको कमान्डमा १३ जनाको टोली उद्धारका लागि परिचालन भएको थियो।
स्थानीयले अवैज्ञानिक तरिकाले गरिएका प्लटिङका कारण घटना घटेको भन्दै सावधानी अपनाउनुपर्नेमा जोड दिएका छन्। प्रहरीले घटनाबारे थप अनुसन्धान गरिरहेको छ।
