संसदीय सुनुवाइ विशेष समितिले सर्वोच्च अदालतको प्रधानन्यायाधीशमा प्रस्तावित डा. मनोज शर्माको सम्बन्धमा उजुरी आह्वान गरेको छ।
समिति सभापति बोधनारायण श्रेष्ठले शुक्रबार बसेको बैठकले जेठ ४ गतेसम्मको समय दिएर उजुरी आह्वान गर्ने निर्णय गरेको जानकारी दिए। प्रस्तावित प्रधानन्यायाधीश शर्माका सम्बन्धमा संसद् सचिवालयमा उपस्थित भएर वा ७७ वटै जिल्ला प्रशासन कार्यालयमार्फत उजुरी गर्न सकिने व्यवस्था गरिएको छ। सभापति श्रेष्ठका अनुसार, नाम किटान गरेर वा बेनामे दुवै प्रकारका उजुरी पठाउन सकिनेछ।
यसअघि बिहीबार बसेको संवैधानिक परिषद् बैठकले सर्वोच्च अदालतका न्यायाधीश मनोज कुमार शर्मालाई प्रधानन्यायाधीश पदमा सिफारिस गर्ने निर्णय गरेको थियो। संवैधानिक परिषद्को पत्र प्राप्त भएलगत्तै संसदीय सुनुवाइ समितिले शुक्रबार नै बैठक राखेर सुनुवाइ प्रक्रिया अगाडि बढाएको हो।
प्राप्त भएका उजुरीहरू जेठ ५ गते बस्ने समिति बैठकमा खोलिने र अध्ययन गरिने सभापति श्रेष्ठले बताए।
