रौतहट जिल्ला प्रशासन कार्यालयले सेवाग्राहीको राहदानी जिल्ला हुलाक कार्यालयमार्फत घरघरमा पुर्याउने सेवा सुरु गरेको छ। यो अभियानले सेवाग्राहीलाई कार्यालयसम्म धाउनुपर्ने झन्झटबाट मुक्ति दिने अपेक्षा गरिएको छ।
गत वैशाख २४ गते जिल्ला प्रशासन कार्यालय र जिल्ला हुलाक कार्यालयबीच भएको सम्झौतापछि पहिलो चरणमा २१ राहदानी सेवाग्राहीको घरमै पुगेर हस्तान्तरण गरिएको छ। प्रमुख जिल्ला अधिकारी दिनेशसागर भुसालले गौर नगरपालिका–२ महादेवपट्टिस्थित राजु राम र विकास पासवानको घरमा पुगेर राहदानी हस्तान्तरण गरेका हुन्।
प्रजिअ भुसालका अनुसार सरकारको सेवा जनताको घरदैलोमै पुर्याउने उद्देश्यका साथ यो अभियान थालिएको हो। राहदानी वितरणमा हुलाक सेवाको प्रयोग गर्दा सेवाग्राहीको समय र खर्च बचत हुने तथा कार्यालय धाउने झन्झट कम हुने उनले बताए।
घरमै राहदानी प्राप्त गर्न चाहने सेवाग्राहीले हुलाक शुल्कबापत ५५ रुपैयाँ बराबरको टिकट खर्च बेहोर्नुपर्ने जिल्ला हुलाक कार्यालयका प्रमुख देवनाथ यादवले जानकारी दिए।
उनका अनुसार पुराना र वितरण हुन बाँकी रहेका पासपोर्टहरू पनि सम्बन्धित स्थानीय तहसँग समन्वय गरी हुलाकमार्फत नागरिकको घरसम्म पुर्याउने तयारी भइरहेको छ। ग्रामीण क्षेत्रका नागरिक, ज्येष्ठ नागरिक, महिला, विद्यार्थी र वैदेशिक रोजगारीमा जान तयारी गरिरहेका सेवाग्राहीका लागि यो व्यवस्था निकै उपयोगी हुने कार्यालय प्रमुख यादवले बताए।
