रसुवाको भोटेकोशी नदीमा बाढी र पहिरोले १,३४४ जनाको ज्यान लिएको पुष्टि भएको छ। नेपाल प्रहरीका अनुसार भदौ २० गते बिहान ५ बजेसम्मको तथ्यांक हो।
प्रहरीले ५२ बालक, ३३ बालिका, २६९ महिला, ४८९ पुरुष र ५०१ आंशिक अंग फेला पारेको जनाएको छ।
एक हजार ३० शव व्यवस्थापन गरिएका छन्। मृतकका एक हजार २६० जनाको डीएनए संकलन भएको छ। ९७२ मृतकका आफन्तको पनि नमूना संकलन गरिएको छ।
बाढीमा बेपत्ता व्यक्तिको पहिचान गर्न सुदूरपश्चिममा आफन्तको डीएनए परीक्षण गर्न नमूना संकलन सुरु भएको छ। सुदूरपश्चिम प्रदेश प्रहरी कार्यालयका प्रवक्ता एसएसपी पदमबहादुर विष्टले यो जानकारी दिए।
सुदूरपश्चिममा १४ जनाको डीएनए परीक्षण गर्न नमूना संकलन भएको छ। कञ्चनपुर र कैलालीका ६–६ र डडेल्धुराका दुई जनाको नमूना संकलन गरिएको हो।
१० भदौमा रसुवाको भोटेकोशीमा आएको बाढीमा २०९ जना बेपत्ता भएका थिए। तीमध्ये ५९ जना सम्पर्कमा आइसकेका छन्।
प्रवक्ता विष्टका अनुसार कैलालीका ४६, कञ्चनपुरका १०, बाजुराका दुई र डडेल्धुराका एक जना सम्पर्कमा आएका छन्।
सुदूरपश्चिमका १५० जना अझै सम्पर्कमा छैनन्। कञ्चनपुरका ३६, डडेल्धुरा र बाजुराका १६–१६, बैतडीका आठ, दार्चुलाका चार, डोटी, बझाङ र अछामका दुई–दुई जना सम्पर्कविहीन छन्।
प्रहरीको पछिल्लो तथ्यांकअनुसार चार हजार ८९८ जना अझै सम्पर्कविहीन छन्।
