गोरखाको सहिद लखन गाउँपालिकामा रास्वपा अधिवेशन फर्जी मतदान र मतगणनाको आरोपले विवादित बनेको छ।
सभापतिका उम्मेदवार मनोज श्रेष्ठले उम्मेदवारलाई जानकारी नदिई मतदान र मतगणना गरिएको दाबी गरेका छन्। अधिवेशनमा पुष्पाखर लामिछाने, मनोज श्रेष्ठ र अमृत श्रेष्ठको उम्मेदवारी परेको थियो।
मनोज श्रेष्ठले कुल १८५ मतदातामध्ये १३४ जनाले मतदान गरेको बताए। उनले पार्टी सदस्य नरहेका व्यक्तिहरूले फर्जी मत खसालेको आरोप लगाए। उनले एउटै व्यक्तिलाई दुई थर राखेर उम्मेदवार खडा गरिएको समेत बताए।
मतदान प्रक्रियामा मात्र होइन, मतगणनामा समेत धाँधली भएको असन्तुष्ट पक्षको आरोप छ। श्रेष्ठका भनाइमा, सहिद लखनमा भएको मतदानको मतपेटिका अन्यत्रै लगेर गनिएको थियो।
मनोज श्रेष्ठले उम्मेदवार वा प्रतिनिधिको रोहवरबिना मतपेटिका लगिएको बताए। मुचुल्का नउठाई एकलौटी परिणाम घोषणा गरिएको उनको गुनासो छ। उनले निर्वाचन कमिटी र पार्टीले विधान पालना नगरेको आरोप लगाए। सम्पूर्ण प्रक्रिया बदर गर्नुपर्ने उनको माग छ।
मतगणनाबाट सभापतिमा पुष्पाखर लामिछाने विजयी भएको घोषणा गरिएको छ। खसेको १३४ मतमध्ये लामिछानेले ९३ मत पाए। निकटतम प्रतिस्पर्धी अमृत श्रेष्ठले ४० तथा मनोज श्रेष्ठले २ मत प्राप्त गरे।
जिल्ला सहसचिव राजेश्वर अंगाईले निर्वाचन समितिको रोहवरमा मतपेटिका जिल्ला लगिएको बताए। सुरक्षित रूपमा गणना गरिएको उनको भनाइ छ। उनले विधान पालना गरेरै चुनाव सम्पन्न भएको दाबी गरे।
प्रदेश सचिवालय सदस्य हरि धितालको संयोजकत्वमा निर्वाचन समिति गठन भएको थियो। अधिवेशनमा सहभागी नेता हरिशरण आचार्यले सामान्य घटनालाई विवाद बनाउन खोजिएको बताए।
आचार्यका अनुसार, मतदान सुरु भएपछि एक जनाले उम्मेदवारी फिर्ता लिन चाहे। तर, मतदान सुरु भइसकेकाले त्यो सम्भव थिएन। उनले अन्य आरोपहरू निराधार रहेको बताए। विवाद उत्पन्न भएपछि मतपेटिका सुरक्षित साथ जिल्लामा लगिएको थियो।
