रौतहट प्रहरीले जेठ १९ गते चलाएको विशेष अभियानमा चेक अनादर मुद्दाका २५ जनासहित २६ फरार अभियुक्त पक्राउ परेका छन्। चन्द्रपुर नगरपालिकाका अधिकांश बासिन्दा चेक अनादर मुद्दामा मुछिएका छन्। प्रहरीका अनुसार हरिप्रसाद प्रसाईँ र समशेर सुनारविरुद्ध दुई–दुई वटा मुद्दा दर्ता छ।
चन्द्रपुर–४ का विवेक घिसिङ, रामबाबु चौधरी, पूजा पराजुली, लछुमा थापा मगर, हरिप्रसाद प्रसाईँ, दीपिका विश्वकर्मा, विकास तिमल्सिना, दुर्गा बहादुर घले, रेखा पाठक र समशेर सुनार पक्राउ परे। चन्द्रपुर–५ का निर्मल भण्डारी, पूजा पराजुली, जक्सन मियाँ कबारी, उमेश साह र ओमनाथ गिरी पनि पक्राउ परे।
यस्तै चन्द्रपुर–६ का रबि अख्तर अन्सारी, गीता कुमारी राई, सबिना कार्की राउत, अमर बहादुर ठाकुर, बसन्तकुमार चौधरी र मुकेश चौधरीलाई पनि चेक अनादर मुद्दामा पक्राउ गरियो। गरुडा–८ का लखिन्द्र गुप्ता र वृन्दावन–८ का विवेक यादव पनि पक्राउ परेका छन्।
पक्राउ परेका २६ जनामध्ये चन्द्रपुर–६ का मुकेश चौधरी भने सवारी ज्यान मुद्दामा पक्राउ परेका हुन्। जिल्ला प्रहरी कार्यालय रौतहटका सूचना अधिकारी प्रहरी नायब उपरीक्षक बसन्त गौतमले यो जानकारी दिए। पक्राउ गरिएका सबैलाई रौतहट जिल्ला अदालतमा उपस्थित गराइएको छ।
