रौतहटको बौधिमाई नगरपालिका-७ बाडा बंकुल टोलबाट प्रहरीले ९० लाख १६ हजार रुपैयाँ बराबरको फर्सीको बिउ बरामद गरेको छ। भारततर्फ अवैध निकासी गर्न लागिएको ३२२ बोरा (१२ हजार ८८० किलो) बिउ बुधबार साँझ नियन्त्रणमा लिइएको हो।
त्रिपालले छोपेर राखिएको अवस्थामा बिउ फेला परेको थियो। सूचना पाएर खटिएको प्रहरी र सशस्त्रको टोलीले सामान बरामद गर्ने क्रममा स्थानीयवासीले अवरोध गरे।
स्थानीयले प्रहरीमाथि ढुंगामुढा प्रहार गरेपछि ६ राउण्ड अश्रुग्यास प्रहार गर्नुपरेको प्रहरीले जनाएको छ। झडपमा तीन प्रहरी र तीन स्थानीय घाइते भएका छन्।
नियन्त्रणमा लिइएको फर्सीको बिउ आवश्यक कारबाहीका लागि भन्सार कार्यालयमा बुझाइएको छ।
