रौतहटको चन्द्रनिगाहपुर–मैरा सडकखण्डमा सोमबार राति वन गस्ती टोलीमाथि काठ तस्कर समूहले गरेको आक्रमणमा पाँच जना घाइते भएका छन्। डिभिजन वन कार्यालय र रङ्गपुर साझेदारी वन उपभोक्ता समितिको संयुक्त टोली काठ चोरी नियन्त्रणका लागि गस्तीमा खटिएको थियो।
तस्कर समूहले जंगलभित्र घेरा हालेर टोलीमाथि कुटपिट गरेको हो। आक्रमणमा डिभिजन वन कार्यालयका सहायक वन अधिकृत राजकुमार चौधरी, वन रक्षक सुरेन्द्र चौधरी, रङ्गपुर साझेदारी वन उपभोक्ता समितिका सदस्य अर्जुन चौधरी र बिमल थापा तथा गस्ती गाडीका चालक अरविन्द पटेल घाइते भएका छन्।
रङ्गपुर साझेदारी वन उपभोक्ता समितिका अध्यक्ष अशोक यादवले वन क्षेत्रमा काठ चोरी भइरहेको सूचनापछि टोली गस्तीमा गएको बताए। जंगलभित्र पुगेपछि तस्कर समूहले संगठित रूपमा उनीहरूमाथि आक्रमण गरेको उनको भनाइ छ।
घाइते वन कर्मचारी र स्थानीय उपभोक्ता समूहले आक्रमणकारीमाथि कडा कारबाहीको माग गरेका छन्। प्रहरी र वन कार्यालयले घटनामा संलग्नहरूको पहिचान र खोजी कार्य तीव्र पारेको जनाएको छ।
वन संरक्षणमा खटिएका कर्मचारीमाथि भएको यो आक्रमणले रौतहटका वन क्षेत्रमा सक्रिय तस्करी सञ्जालको प्रभाव र सुरक्षा व्यवस्थामाथि प्रश्न उठाएको छ।
