रौतहटको सडकमा टिपर आतंकले ९ दिनमा दुईको ज्यान लिएको छ। मंगलबार गरुडा चिनीमिल नजिक टिपरले मोटरसाइकललाई ठक्कर दिँदा कटहरिया–६ का २० वर्षीय शेख स्वयलको घटनास्थलमै मृत्यु भयो।
दुर्घटनामा मोटरसाइकलमा सवार शेख आशिक गम्भीर घाइते छन्। प्रहरीका अनुसार मधेश प्रदेश ०३–००१ क २५१६ नम्बरको टिपरले विपरीत दिशाबाट आइरहेको ना २८ प ७२५९ नम्बरको मोटरसाइकललाई ठक्कर दिएको थियो।
यसअघि जेठ २४ गते गढीमाई–४ सुन्दरपुर चोक नजिक प्रदेश–२–०३–००१ ख २६३३ नम्बरको टिपरले ठक्कर दिँदा मलाही गाउँका ३५ वर्षीय प्रमोद सहनीको मृत्यु भएको थियो। चालक फरार भएपछि प्रहरीले वृन्दावन–२ निवासी २४ वर्षीय अब्दुल एजाजलाई पक्राउ गरेको छ।
स्थानीयका अनुसार असार लागेपछि नदीजन्य पदार्थको ढुवानी तीव्र भएको छ। असारे विकास बजेट खर्च गर्न व्यवसायीले ठूलो परिमाणमा भण्डारण गरेका ढुङ्गा, गिटी र बालुवा ओसारिरहेका छन्। यसले मुख्य र भित्री सडकमा टिपरको चाप बढाएको छ।
स्थानीयले प्रहरी प्रशासनको मौन समर्थन र अनुगमन अभावमा अवैध क्रसरका टिपरले आतंक मच्चाएको आरोप लगाएका छन्। तीव्र गति, लापरवाही र ट्राफिक नियम उल्लंघनले निर्दोष नागरिकले ज्यान गुमाउनुपरेको उनीहरूको गुनासो छ।
बारम्बारको दुर्घटनापछि पनि नियन्त्रणका लागि प्रभावकारी कदम नचाल्दा टिपर आतंक भयावह बनेको छ। ज्यान गुमाउनेको संख्या बढेपछि अवैध क्रसर सञ्चालन, नदीजन्य पदार्थको ढुवानी र टिपरको गति नियन्त्रण गर्न सरोकारवालाले माग गरेका छन्।
