सङ्खुवासभा जिल्ला अस्पतालमा पाठेघर खस्ने समस्या भएका १५ विपन्न महिलाको निःशुल्क शल्यक्रिया गरिएको छ। जेठ १९ देखि २२ गतेसम्म सञ्चालित शिविरमा भोजपुर र सङ्खुवासभाका महिलाहरूले यो सेवा पाएका हुन्।
अस्पतालका प्रमुख मेडिकल सुपरिटेण्डेन्ट डा. सन्तोष देवका अनुसार, आर्थिक अभावका कारण उपचार गराउन नसकेका महिलाहरू यस शिविरबाट लाभान्वित भएका छन्। ग्रामीण तथा दुर्गम क्षेत्रका धेरै महिला कमजोर आर्थिक अवस्था र जनचेतनाको अभावले वर्षौँदेखि यो समस्या सहेर बस्न बाध्य हुने गरेका छन्।
“समयमै उपचार नपाउँदा महिलाको दैनिक जीवन, स्वास्थ्य र मानसिक अवस्थासमेत प्रभावित हुने गरेको छ,” डा. देवले भने, “शिविरमा बिरामीको स्वास्थ्य परीक्षण, आवश्यक परामर्श तथा शल्यक्रियापछि औषधि र स्वास्थ्य निगरानीसमेत निःशुल्क उपलब्ध गराइयो।”
शिविरमा करिब एक सय महिलाको स्वास्थ्य परीक्षण गरिएको थियो। बिरामीलाई खान बस्नको निःशुल्क व्यवस्था मिलाइएको थियो। जिल्ला अस्पतालमा हाल हार्ड जोर्नी विशेषज्ञ सेवा, बालरोग, सामान्य शल्यक्रिया, फिजियोथेरापी, प्रसूतिलगायत सेवा सञ्चालनमा छन्।
सङ्खुवासभाका १० स्थानीय तहका साथै छिमेकी जिल्ला भोजपुरका आधाभन्दा बढी भेगका नागरिकसमेत उपचारका लागि यस अस्पतालमा आउने गरेका छन्।
