सर्लाहीको लालबन्दी नगरपालिका–६, पाख्रिन टोलकी ३६ वर्षीया सपना सुनुवार दुवै मिर्गौला फेल भएपछि उपचारका लागि आर्थिक सहयोगको याचना गरिरहेकी छन्। विगत ६ महिनादेखि थलिएकी उनको नियमित डायलाइसिसका लागि खर्च जुटाउन परिवारलाई कठिनाइ भएको हो।
चिकित्सकले उनलाई हप्तामा दुई पटक डायलाइसिस गर्न सल्लाह दिएका छन्। सरकारी अस्पतालमा पालो नपाएपछि उनका पति चेतबहादुर सुनुवारले सपनालाई बाराको कलैयास्थित एलएस न्यूरो अस्पताल लैजाने गरेका छन्।
अस्पतालले डायलाइसिस निःशुल्क गरे पनि कलैयासम्मको यात्रा, रगत र औषधिका लागि मासिक करिब ४ हजार रुपैयाँभन्दा बढी खर्च हुने गरेको चेतबहादुरले बताए। एक पटकको बस यात्रामा मात्रै १ हजार २०० रुपैयाँ लाग्ने गरेको छ।
चेतबहादुरले प्रादेशिक अस्पताल जनकपुर, नारायणी अस्पताल वीरगन्ज र ईश्वरपुर नगरपालिकाको बयलवासस्थित नगर अस्पतालमा डायलाइसिसको पालोका लागि अनुरोध गरे पनि पाउन सकेनन्। यसले गर्दा उनी थप निराश बनेका छन्।
सपनाको उपचार हालसम्म छिमेकी, गाउँले र विदेशमा रहेका व्यक्तिहरूको सहयोगमा चलिरहेको छ। गाउँबाट ५५ हजार रुपैयाँ र विदेशबाट ५२ हजार रुपैयाँ सहयोग जुटिसकेको छ, जुन उपचारमै खर्च भएको चेतबहादुरले जानकारी दिए।
भारतको नयाँदिल्लीमा मजदुरी गर्दै आएका चेतबहादुर श्रीमती बिरामी भएपछि ६ महिनादेखि घरमै छन्। आम्दानीको स्रोत बन्द भएपछि ६ वर्ष र ३ वर्षका दुई छोरीसहितको परिवारको आर्थिक अवस्था झन् कमजोर बनेको छ। उनीहरूको ६ धुर जग्गामा एउटा कच्ची घर मात्रै सम्पत्तिको नाममा छ।
नगरपालिकाबाट मिर्गौला पीडित बिरामीका लागि मासिक ५ हजार रुपैयाँ सहयोग उपलब्ध हुने व्यवस्था भए पनि उक्त रकम तीन महिनामा एकमुष्ट आउने भएकाले नियमित उपचारका लागि तत्काल आवश्यक पर्ने रकम जुटाउन कठिन भएको चेतबहादुरको गुनासो छ।
सपनाको उपचारमा सहयोग गर्न चाहनेले एनएमबी बैंक, लालबन्दी शाखामा रहेको उनको खातामा रकम जम्मा गर्न सक्ने परिवारले जनाएको छ। थप जानकारीका लागि ९७०२४१३६३२ मा सम्पर्क गर्न सकिनेछ।
