सर्लाहीको कबिलासी नगरपालिका–६ जमुनियाँमा सञ्चालित सडक ढलान योजनामा प्राविधिक मापदण्ड उल्लंघन भएको छ। करिब १० लाख रुपैयाँ बजेटको यो योजनामा आवश्यक तयारीबिनै माटोमाथि ढलान गरिएको भन्दै स्थानीयले छानबिनको माग गरेका छन्।
स्थानीय नेता रामगोविन्द यादवका अनुसार, सडक ढलानअघि सब–बेस र बेस निर्माण नगरी सिधै माटोमाथि कंक्रिट हालिएको छ। स्वीकृत योजना पोखरीदेखि रामजी ठाकुरको घरसम्म हुनुपर्नेमा कार्यान्वयनमा पोखरीदेखि पलधारी रायको घरसम्म सडक ढलान भइरहेको छ।
योजनाको चौडाइमा पनि विवाद छ। सुरुमा १३ फिट भनिएको चौडाइ घटाएर १० फिटमा झार्न खोज्दा स्थानीयले विरोध जनाए। हाल करिब ११ फिट चौडाइमा ढलान भइरहेको छ।
स्थानीयवासीले संरचनागत तयारीबिनाको ढलानले सडकको गुणस्तरमा असर गर्ने र सार्वजनिक लगानी जोखिममा पर्ने चिन्ता व्यक्त गरेका छन्। जनप्रतिनिधि र प्राविधिकको निगरानीमा काम भए पनि मापदण्ड नमानिएको उनीहरूको आरोप छ।
कबिलासी नगरपालिकाका प्रमुख ब्रह्मदेव रायले योजना स्वीकृत स्टिमेटअनुसार नै भइरहेको दाबी गरे। रातोपाटीसँग उनले ढुङ्गा बिछ्याएर ढलान गर्ने व्यवस्था स्टिमेटमै रहेको बताए।
वडा नम्बर ६ का अध्यक्ष पुरुषोत्तम रायले पनि योजना मापदण्डअनुसार अघि बढेको बताए। १० लाख बजेटमा ११ फिट चौडाइ, ६ इन्च मोटाइ र सोलिङ ग्राभेलमाथि ढलान गरिएको उनको भनाइ छ। योजनाको नामाङ्कनमा त्रुटि सच्याउने प्रक्रिया चलिरहेको उनले स्वीकार गरे।
नगरपालिकाका ओभरसियर अभिनन्दन रायले सोलिङ ग्राभेलमाथि ढलान सामान्य अभ्यास भएको बताए। निर्माण कार्य कोटेशन प्रक्रियामा रहेको उनको भनाइ छ।
स्थानीयवासीले योजनाको स्थलगत निरीक्षण गरी मापदण्ड पालना भए नभएको निष्पक्ष मूल्यांकन गर्न माग गरेका छन्। मापदण्डविपरीत निर्माण भएको पाइए काम रोकेर जिम्मेवार पक्षमाथि कारबाही गर्नुपर्ने उनीहरूको माग छ।
