सर्लाहीको मलंगवाबाट सरकारी अनुदानको मल कालोबजारी गर्ने तीन जना पक्राउ परेका छन्। प्रहरीले कृष्ण जनरल स्टोरबाट चार बोरा डिएपी र सात बोरा युरिया मल बरामद गरेको छ।
प्रारम्भिक अनुसन्धानमा उनीहरूले अनुदानको डिएपी मल प्रतिबोरा ३,५०० रुपैयाँसम्ममा बिक्री गरेको स्वीकार गरेका छन्। मलंगवा–७ का २३ वर्षीय अभिनय राय र २० वर्षीय अभिनन्दन रायले मलंगवा–४ का २८ वर्षीय राहुल गुप्ताको पसलबाट प्रतिबोरा ३,२०० रुपैयाँमा खरिद गरी नाफामा बिक्री गर्ने गरेको बयान दिए।
सोही बयानका आधारमा प्रहरीले गुप्तालाई नियन्त्रणमा लिएको छ। जिल्ला प्रहरी कार्यालय सर्लाहीका प्रवक्ता डिएसपी वेदप्रसाद गौतमले थप सात बोरा युरिया मल बरामद भएको जानकारी दिए।
तीनै जनाविरुद्ध कालोबजारी कसूरमा जिल्ला प्रशासन कार्यालय सर्लाहीबाट सात दिनको म्याद थप गरी अनुसन्धान भइरहेको छ। प्रहरीले कृषि सामग्रीको दुरुपयोग रोक्न निगरानी कडा पार्ने जनाएको छ।
