सर्लाहीको भूमिगत जलस्रोत तथा सिँचाइ विकास डिभिजन कार्यालयका प्रमुख अनुपमा ढकाल र मेकानिकल अधिकृत तुलाकान्त चौधरी घुससहित पक्राउ परेका छन्। अख्तियार दुरुपयोग अनुसन्धान आयोग बर्दिबासको टोलीले सेवाग्राहीसँग लिएको ७ लाख ५० हजार रुपैयाँ नगदसहित उनीहरूलाई पक्राउ गरेको हो।
ढकालको सर्लाहीको बागमती नगरपालिका–१२ स्थित निवासमा छापा मार्दा उनी बसेको सोफामा उक्त रकम भेटिएको अख्तियार बर्दिबासका सूचना अधिकारी प्रकाश पोखरेलले बताए। जल उपभोक्ता समितिसँग बोरिङ तथा मोटर जडानको भुक्तानीका लागि ढकालले चौधरीमार्फत घुस मागेको उजुरी परेको थियो।
खानतलासीका क्रममा स्रोत नखुलेको थप ७१ हजार ११५ रुपैयाँ पनि बरामद भएको छ। पक्राउ परेका दुवैमाथि थप अनुसन्धान भइरहेको अख्तियारले जनाएको छ।
