५ लाख १२ हजारभन्दा बढी विद्यार्थीको भविष्य जोडिएको माध्यमिक शिक्षा परीक्षा (एसईई) को नतिजा सार्वजनिक हुनुअघि नै राष्ट्रिय परीक्षा बोर्डको वेबसाइट डाउन भएको छ।
परीक्षा नियन्त्रक टुकराज अधिकारीका अनुसार विद्यार्थीहरूले बिहान ९ बजेपछि नतिजा हेर्न सक्नेछन्। नतिजाको व्यग्र प्रतीक्षामा परीक्षा बोर्ड बाहिर विद्यार्थी र अभिभावकहरू जम्मा भएका छन्।
बोर्डको आधिकारिक वेबसाइट (neb.gov.np) खोल्न खोज्दा ‘502 Bad Gateway’ समस्या देखिएको छ।
विद्यार्थीहरूले निम्न माध्यमबाट नतिजा हेर्न सक्नेछन्:
- नेपाल टेलिकम: १६०० (SMS/USSD र IVR सेवा)
- जानकी टेक्नोलोजी: ३५००१ (SMS सेवा)
- एम्बिसन गुरु: ३१०६१ (SMS सेवा)
- आधिकारिक सरकारी साइट: www.see.gov.np र www.neb.gov.np
- नेपाल टेलिकम: www.see.ntc.net.np
- कान्तिपुर पब्लिकेसन्स: www.ekantipur.com
- इडियु सञ्जाल: www.see.edusanjal.com
- खल्ती: https://khalti.com/app
एसईई परीक्षा गत चैत १९ देखि २९ गतेसम्म सञ्चालन भएको थियो। यसपटक परीक्षा केन्द्रमै उत्तरपुस्तिका परीक्षण गरिएकाले नतिजा छिटो सार्वजनिक भएको बोर्डले जनाएको छ।
यसवर्ष ५ लाख १२ हजार ४२१ जना विद्यार्थीले एसईई फारम भरेका थिए। तीमध्ये, नियमिततर्फ ४ लाख ४१ हजार ५६६ जना र ग्रेड वृद्धितर्फ ७० हजार ८५५ जनाले परीक्षा दिए। कुल विद्यार्थीमध्ये २ लाख ५७ हजार ६१३ छात्रा, २ लाख ५४ हजार ८०१ छात्र र ७ जना अन्य रहेका छन्।
