काठमाडौं । श्रम संस्कृति पार्टीले सभामुख डोलप्रसाद अर्यालको भूमिकाप्रति असन्तुष्टि जनाउँदै बुधबारको प्रतिनिधि सभा बैठक अवरुद्ध गरेको छ। पार्टीका अध्यक्ष हर्क साम्पाङसहितका सांसदहरूले रोष्टम घेराउ गरी नाराबाजी गरेका हुन्।
पार्टीका सांसदहरूले सभामुखले आफूहरूलाई बोल्न नदिएको र विभेद गरेको आरोप लगाएका छन्। अध्यक्ष साम्पाङले प्रधानमन्त्रीलाई बोलाउन नसकेको भन्दै सभामुखलाई आफूहरूलाई कारबाही गरेर देखाउन चुनौती दिएका छन्।
सभामुख अर्यालले सरकारको तर्फबाट परराष्ट्रमन्त्री शिशिर खनालको मन्तव्य चलिरहेका बेला पनि श्रम संस्कृति पार्टीका सांसदहरूले विरोध जनाएको बताइएको छ।
सभामुख अर्यालले भने विपक्षी दलका नेताहरूलाई बोल्न समय दिए पनि श्रम संस्कृति पार्टीका अध्यक्ष साम्पाङले नाम नटिपाएका कारण बोल्नका लागि समय नदिएको जनाइएको छ। यस क्रममा सभामुख अर्यालले संसद बैठक भने अघि बढाएका छन्।
