सिरहाको मिर्चयादेखि उदयपुरको कटारी हुँदै ओखलढुंगा र सोलुखुम्बु जोड्ने सिद्धिचरण लोकमार्गको कटारी–घुर्मी खण्ड दुई दशकपछि बन्ने भएको छ। सडक स्तरोन्नतिका लागि सरकारले ३ अर्ब ९४ करोड ५४ लाख ९८ हजार २ सय ९१ रुपैयाँ बजेट सुनिश्चित गरेपछि ठेक्का प्रक्रिया अघि बढेको हो।
कटारीको मरुवादेखि घुर्मीसम्मको ४६ किलोमिटर सडकमध्ये पहिलो चरणमा मरुवा–बेतिनी १५ किलोमिटर र बेतिनी–गहुँबारी १२.५ किलोमिटर गरी २७.५ किलोमिटर स्तरोन्नति गरिनेछ। योजना प्रमुख डीई विवेक पाण्डेका अनुसार ५७ वटा बोलपत्र परेका छन्।
पाण्डेले दसैँअघि ठेक्का सम्झौता गरी दसैँ–तिहारलगत्तै निर्माण सुरु गर्ने तयारी रहेको बताए। बाँकी गहुँबारी–घुर्मी १२.५ किलोमिटर सडकका लागि आगामी वर्ष बजेट माग गरिनेछ।
पुरानो प्रविधिबाट बनेको साँघुरो सडकमा क्षमताभन्दा बढी भार बोकेका सवारी गुड्दा सडक जीर्ण बनेको स्थानीय बताउँछन्। वर्षायाममा पहिरो र खाल्डाखुल्डीले यातायात अवरुद्ध हुने गरेको छ।
कटारी नगरप्रमुख राजेशचन्द्र श्रेष्ठले वर्षौँको प्रयासपछि सडक स्तरोन्नतिका लागि बजेट सुनिश्चित भएकाले अब सडक बन्ने आशा जागेको बताए।
कालोपत्रेसहित स्तरोन्नतिपछि कटारीका पहाडी वडा नगरमुकामसँग जोडिनेछन्। यसले ओखलढुंगा–सोलुखुम्बु आवागमन र त्रिधार्मिकस्थल हलेसीसम्मको यात्रासमेत सहज बनाउने अपेक्षा छ।
