सिरहाको गोलबजार नगरपालिका–७ मा आइतबार वर्षाको पानी जमेर बनेको पोखरीमा डुबेर एकै परिवारका तीन बालबालिकाको ज्यान गएको छ। स्थानीय पशु बजार नजिकको खाल्डोमा जमेको पानीमा नुहाउने क्रममा यो दुःखद घटना भएको हो।
मृत्यु हुनेमा स्थानीय अब्बास खानका ८ वर्षीय छोरा सैफुल शेख, १० वर्षीया छोरी रुबिना खातुन र १२ वर्षीया छोरी सवनम खातुन रहेका छन्। तीनै जना दाजुभाइ–दिदीबहिनी हुन्।
वर्षायाममा पशु बजार क्षेत्रको खाल्डोमा पानी जमेर अस्थायी पोखरी बनेको थियो। सोही स्थानमा खेल्न र नुहाउन गएका बालबालिकाहरू गहिरो पानीमा डुबेका थिए।
घटनाको जानकारी पाउनासाथ नेपाल प्रहरी र सशस्त्र प्रहरी बलको टोली घटनास्थल पुगेर उद्धार तथा खोजी कार्यमा खटिएको थियो। उद्धारपछि तीनै बालबालिकालाई बाहिर निकालिए पनि ज्यान जोगाउन नसकिएको प्रहरीले जनाएको छ।
घटनाले स्थानीय समुदायलाई शोकमा डुबाएको छ। वर्षाको समयमा खुला खाल्डाखुल्डी र पानी जम्ने स्थानहरू बालबालिकाका लागि जोखिमपूर्ण हुने भएकाले यस्ता क्षेत्रको व्यवस्थापन र निगरानीमा सम्बन्धित निकायले ध्यान दिनुपर्ने आवाज उठेको छ।
प्रहरीले घटनाबारे आवश्यक अनुसन्धान सुरु गरेको छ। सुरुमा पाँच जना बालबालिका पानीमा डुबेको चर्चा चले पनि हालसम्म तीन जनाको मृत्यु भएको मात्र पुष्टि भएको छ। अन्यको अवस्थाबारे सुरक्षा निकायले थप खोजी गरिरहेको छ।
