सिरहाको गोलबजार नगरपालिका क्षेत्रमा लगाइएको कर्फ्यु आदेश हटाइएको छ। जिल्ला प्रशासन कार्यालय सिरहाले आइतबारदेखि लागू हुने गरी कर्फ्यु हटाएको हो। यसैगरी, धनुषा जिल्ला प्रशासन कार्यालयले जनकपुरधाम उपमहानगरपालिकालगायतका क्षेत्रमा जारी गरेको निषेधाज्ञा पनि हटाएको छ।
सिरहामा स्थानीय प्रशासन ऐन, २०२८ को दफा ६ (क) बमोजिम प्रमुख जिल्ला अधिकारी सुरेन्द्र पौडेलद्वारा कर्फ्यु आदेश जारी गरिएको थियो। सुनसरीमा भएको घटनापछि उत्पन्न तनाव र सिरहाको औरही गाउँपालिका-२ तुलसियाहीका १५ वर्षीय गणेश यादवको प्रहरीसँगको झडपमा गोली लागि मृत्यु भएपछि गोलबजार क्षेत्रमा आन्दोलन चर्किएको थियो। शान्ति सुरक्षा कायम गर्न अनिश्चितकालीन कर्फ्यु लगाइएको थियो।
पीडित पक्ष र सरकारबीच सहमति भएपछि आन्दोलन रोकिएसँगै कर्फ्यु हटाइएको हो। जिल्ला प्रशासन कार्यालयले कर्फ्यु हटाइए पनि कानुनको पालना गर्न, सामाजिक सद्भाव कायम राख्न र कुनै पनि अफवाहको पछि नलाग्न आग्रह गरेको छ।
धनुषामा प्रमुख जिल्ला अधिकारी प्रेमप्रसाद लुइँटेलले साउन १८ गते सोमबार बिहान ५ बजेदेखि निषेधाज्ञा पूर्ण रूपमा हटाउने सूचना जारी गरेका हुन्। स्थानीय प्रशासनले साउन १६ गते शनिबार बिहान १० बजेदेखि स्थानीय प्रशासन ऐन, २०२८ को दफा ६(३क) बमोजिम निषेधाज्ञा जारी गरेको थियो।
प्रशासनले आन्दोलनरत पक्षले आफ्ना सबै कार्यक्रम फिर्ता लिएको, जिल्लाको सुरक्षा अवस्था सामान्य बन्दै गएको र जनजीवन क्रमशः सामान्यीकरणतर्फउन्मुख भएको जनाएको छ। पछिल्लो सुरक्षा अवस्थाको समीक्षा र जिल्ला सुरक्षा समितिको बैठकको निर्णयका आधारमा निषेधाज्ञा हटाउने निर्णय गरिएको हो।
धनुषा प्रशासनले निषेधाज्ञा हटेपछि नागरिकलाई शान्ति, सुरक्षा र सामाजिक सद्भाव कायम राख्दै दैनिक गतिविधि सञ्चालन गर्न आग्रह गरेको छ। यस निर्णयसँगै जनकपुरधाम क्षेत्रमा यातायात, व्यापार र अन्य सार्वजनिक गतिविधि सहज रूपमा सञ्चालन हुने अपेक्षा गरिएको छ।
