सिरहाको गोलबजार र लहान क्षेत्रमा एलपी ग्यासको चरम अभाव छ। उपभोक्ता बिहानैदेखि खाली सिलिन्डर बोकेर डिलरमा घण्टौँ लाइन बस्न बाध्य छन्। यो दृश्य पछिल्ला केही दिनयता दैनिकजसो दोहोरिँदैछ।
ग्यास नपाउँदा धेरै परिवार वैकल्पिक इन्धनको खोजीमा छन्। कतिपयले छिमेकीसँग ग्यास सापटी माग्नुपर्ने अवस्था आएको छ। यसले दैनिक जीवनमा सास्ती थपेको छ।
गोलबजार नगरपालिका ४, लहान नगरपालिका ३, रघुनाथपुर चोक तथा सडक डिभिजन कार्यालयअगाडिका डिलरमा बिहानैदेखि लामो लाइन देखिन्छ। घण्टौँ कुर्दा पनि ग्यास पाउने सुनिश्चितता नभएको उपभोक्ताको गुनासो छ।
स्थानीयका अनुसार नियमित आपूर्ति नहुँदा अभाव चुलिएको हो। मागअनुसार आपूर्ति नहुँदा डिलरहरूले सीमित ग्यास वितरण गरिरहेका छन्।
गृहिणी, ज्येष्ठ नागरिकदेखि दैनिक ज्यालादारी गर्ने श्रमिकसम्म ग्यासका लागि लाइनमा छन्। यसले दैनिक कामकाज प्रभावित हुनुका साथै घरायसी व्यवस्थापनमा कठिनाइ थपेको छ।
उपभोक्ताले ग्यास आपूर्ति नियमित गर्न सम्बन्धित निकाय र कम्पनीहरूको ध्यानाकर्षण गराएका छन्। कृत्रिम अभाव रोकी बजारमा पर्याप्त ग्यास उपलब्ध गराउन माग गरिएको छ।
