सोलुखुम्बुको दुर्गमबाट एक सुत्केरी महिला र आत्महत्या प्रयास गरेका युवाको नेपाली सेनाको हेलिकप्टरमार्फत उद्धार गरिएको छ। जिल्ला प्रशासन कार्यालय सोलुखुम्बुको समन्वयमा उनीहरूलाई निःशुल्क हवाई सेवामार्फत काठमाडौं ल्याई उपचार गरिएको हो।
थुलुङ दूधकोशी गाउँपालिका–७ की ३८ वर्षीया शारदा बस्नेतलाई प्रसूतिमा जटिलता देखिएपछि थापाथली प्रसूति गृह लगिएको छ। बुधबार बिहान बच्चा जन्मे पनि स्वास्थ्यमा समस्या आएपछि उनलाई थप उपचारका लागि रिफर गरिएको थियो।
साउन २६ गते राति आत्महत्याको प्रयास गरेका २९ वर्षीय पुरुषलाई जिल्ला अस्पताल फाप्लुमा उपचार सम्भव नभएपछि काठमाडौंको ट्रमा सेन्टर पठाइएको छ। दुवैको उद्धारका लागि नेपाली सेनाको हेलिकप्टर प्रयोग गरिएको थियो।
प्रमुख जिल्ला अधिकारी कमानसिं थापामगरले दुर्गम जिल्लामा गम्भीर स्वास्थ्य समस्या भएका नागरिकको उपचारमा ढिलाइ नहोस् भन्ने उद्देश्यले तत्काल उद्धारको व्यवस्था मिलाइएको बताए। उनले आकस्मिक अवस्थामा समयमै उपचारको पहुँचमा पुर्याउन सम्बन्धित निकायसँग समन्वय गरिएको जानकारी दिए।
सोलु सामुदायिक अस्पताल फाप्लुका प्रमुख डाक्टर राजेन्द्र बस्नेतले दुर्गम हिमाली जिल्लामा जटिल स्वास्थ्य समस्या भएका बिरामीलाई समयमै सुविधा सम्पन्न अस्पतालसम्म पुर्याउन हवाई उद्धार प्रभावकारी माध्यम बनेको बताए। उनले आकस्मिक अवस्थामा उपचारको पहुँच विस्तारका लागि सरकारी निकायबीचको समन्वय आवश्यक रहेको औंल्याए।
