सुदूरपश्चिम प्रदेशमा लामो समयदेखिको बजेट शून्यता अन्त्य गर्न सर्वदलीय सहमति जुटेको छ। मुख्यमन्त्री खगराज भट्टको पहलमा बसेको बैठकले बजेट निर्माण प्रक्रिया अघि बढाउने निर्णय गरेको हो।
सहमतिपछि आज मन्त्रिपरिषद्को बैठक बस्दैछ। बैठकमा बजेट निर्माण र बजेट शून्यताको अन्त्य गरी तत्काल बजेट ल्याउने विषयमा छलफल हुनेछ।
मुख्यमन्त्री तथा मन्त्रिपरिषद्को कार्यालयमा शुक्रबार साँझ बसेको सर्वदलीय बैठकमा प्रदेशसभामा प्रतिनिधित्व गर्ने विभिन्न राजनीतिक दलका प्रतिनिधिहरूको सहभागिता थियो। बैठकले प्रदेशको बजेट निर्माण प्रक्रिया तत्काल अघि बढाउने निर्णय गरेको छ।
प्रदेशमा बजेटको अभावले सरकारका नियमित कामकारबाही, सार्वजनिक सेवा प्रवाह र विकास निर्माणका गतिविधिमा असर पर्न सक्ने भएकाले बजेट निर्माणलाई प्राथमिकता दिने विषयमा दलहरूबीच सहमति भएको छ।
बैठकले प्रदेशको वर्तमान आर्थिक अवस्था र आवश्यकतालाई मध्यनजर गर्दै प्रचलित कानुनअनुसार आवश्यक प्रक्रिया पूरा गरी बजेट निर्माणको काम तत्काल अघि बढाउने निर्णय गरेको छ। सर्वदलीय सहमतिले प्रदेश सरकारलाई बजेट निर्माण र त्यसका लागि आवश्यक कानुनी प्रक्रिया अघि बढाउने बाटो खुलेको छ।
