काठमाडौँ उपत्यकामा चिनीको मूल्य ११० रुपैयाँ प्रति केजी कायम भएको छ। वाणिज्य, आपूर्ति तथा उपभोक्ता संरक्षण विभागले उपत्यकाका एक हजारभन्दा बढी बिक्री केन्द्रबाट यो मूल्यमा चिनी उपलब्ध भइरहेको जनाएको छ।
विभागले आज एक प्रेस विज्ञप्ति जारी गर्दै चिनीको आपूर्ति सहज र पर्याप्त रहेको स्पष्ट पारेको छ। आम उपभोक्तालाई चिनी अधिक मात्रामा सञ्चय नगर्न पनि अनुरोध गरेको छ।
चिनीको मूल्य वृद्धि भएको भन्ने उपभोक्ताको गुनासो बढेपछि उद्योग, वाणिज्य तथा आपूर्तिमन्त्री दीपककुमार साहले सरोकारवालाहरूसँग छलफल गरेका थिए। मन्त्री साहले बजार अनुगमनलाई तीव्रता दिन र उपभोक्तालाई सहज मूल्यमा चिनी उपलब्ध गराउन निर्देशन दिएका थिए।
विभागले बजारमा चिनीको कृत्रिम अभाव सिर्जना गर्ने वा बढी मूल्यमा बिक्री गर्ने व्यवसायीलाई कारबाही गरिने चेतावनी दिएको छ।
