असार तेस्रो सातादेखि सुकुम्बासीलाई लालपुर्जा वितरण सुरु गरिने भएको छ।
भूमि व्यवस्था, सहकारी, सङ्घीय मामिला तथा सामान्य प्रशासनमन्त्री प्रतिभा रावलले प्रतिनिधिसभामा सांसदहरूको प्रश्नको जवाफ दिँदै यस्तो जानकारी दिएकी हुन्।
श्रम संस्कृति पार्टीका अध्यक्ष हर्क साम्पाङले सुकुम्बासीलाई लालपुर्जा दिइन्छ कि दिइँदैन भनी प्रश्न उठाएका थिए। उनले काठमाडौंका सुकुम्बासीलाई विस्थापन गरी होल्डिङ सेन्टरमा राखिएको र त्यहाँको व्यवस्थापन पनि सन्तोषजनक नभएको बताए। साम्पाङले व्यवस्थापन गर्न नसके पहिले बसेकै ठाउँमा व्यवस्थापन गर्न आग्रह गरे।
मन्त्री रावलले लालपुर्जा वितरणको काम सुरु भइसकेको र असारको तेस्रो हप्ताबाट वितरण सुरु गर्ने प्रतिबद्धता जनाइन्।
विगतमा सरकारले भूमि आयोगमार्फत काम गर्दै आएको थियो। वर्तमान सरकारले भूमि व्यवस्थापन समिति गठन गरी सुकुम्बासीको व्यवस्थापनको काम अगाडि बढाएको छ।
