प्रधानमन्त्री बालेन शाहले राष्ट्रका नाममा सम्बोधन गर्ने भएका छन्। केहीबेरमा हुने सम्बोधन सुनसरीको देवानगञ्ज घटनापछिको परिस्थितिका सन्दर्भमा हुनेछ। राष्ट्रका नाममा उहाँको यो पहिलो सम्बोधन हुनेछ।
यसैबीच, सुनसरीको देवानगञ्ज गाउँपालिका–३, कप्तानगञ्जमा भएको हिंसात्मक घटनाको विरोधमा राष्ट्रिय एकता दलका अध्यक्ष विनय यादव काठमाडौँमा आमरण अनसनमा बसेका छन्। सरकारलाई २४ घण्टे अल्टिमेटम दिँदा पनि ठोस पहल नभएको भन्दै यादवले अनसन सुरु गरेका हुन्। अनसनस्थलमा घटनामा ज्यान गुमाएका युवाको तस्बिर राखिएको छ। पीडित परिवारलाई न्याय दिलाउनुपर्ने माग छ।
सहभागीले सरकारले घटनालाई सामान्यीकरण गर्न खोजेको आरोप लगाएका छन्। उनीहरूले घटनाको छानबिन गरी दोषीमाथि कडा कारबाहीको माग गरेका छन्। अध्यक्ष यादवले न्याय नपाएसम्म आन्दोलन नरोकिने बताएका छन्।
राष्ट्रिय एकता दलले मृतकलाई सहिद घोषणा र घाइतेको उपचारजस्ता माग सरकारसमक्ष राखेको छ।
यसैगरी, सुनसरी घटनाको विरोधमा सप्तरीको राजविराज र बोदेबरसाईनमा प्रदर्शन भइरहेको छ। प्रदर्शनकारीले राजविराज बजारका पसल बन्द गराएका छन्। बोदेबरसाईन बजारमा साप्ताहिक हाटबजार प्रभावित भएको छ।
जिल्ला प्रशासन कार्यालय सप्तरीमा बसेको सर्वपक्षीय सर्वदलीय बैठकले धार्मिक सहिष्णुता, सामाजिक सद्भाव र शान्ति–सुरक्षा कायम राख्न सार्वजनिक अपिल गरेको छ।
