सुनसरीको देवानगञ्ज गाउँपालिका-३ कप्तानगञ्जमा साउन १० गते भएको घटनामा मृत्यु भएका रवीन्द्रकुमार मेहतालाई सहिद घोषणा गर्ने प्रक्रिया अघि बढाइने भएको छ। गृहमन्त्री सुधन गुरुङ र मृतकका अभिभावकबीच आइतबार राति भएको सात बुँदे सहमतिमा यो बुँदा प्रमुख छ।
सहमतिअनुसार घटनाको निष्पक्ष छानबिन गरी दोषीमाथि प्रचलित कानुनबमोजिम कारबाही गरिनेछ। सरकारले मृतकका परिवारका एक योग्य सदस्यलाई रोजगारी दिलाउन पहल गर्नेछ। देवानगञ्ज-३ स्थित मदरसाको कानुनी हैसियतबारे पनि तत्काल छानबिन प्रारम्भ गरिनेछ।
घटनाको अध्ययनका लागि गठित छानबिन समितिको प्रतिवेदनका सुझाव कानुनबमोजिम कार्यान्वयन गरिनेछ। सरकारले मृतकको शव नेपाली सेनाको हेलिकप्टरमार्फत देवानगञ्ज पुर्याई दाहसंस्कारको व्यवस्था मिलाउनेछ।
यस्तै, घटनामा ज्यान गुमाएका तीनै जनाको सम्झनामा गाउँपालिकाको उपयुक्त क्षेत्रमा यसै वर्ष बजेट विनियोजन गरी ‘स्मृति पार्क’ निर्माण गरिनेछ। स्थानीय सरकारसँग समन्वय गरी पार्क निर्माणको काम अघि बढाइनेछ।
