सुनसरीको देवानगञ्ज–३ कप्तानगञ्जमा प्रहरीको गोली लागेर २४ वर्षीय ओमप्रकाश मेहताको मृत्यु भएपछि सिरहाको गोलबजार नगरपालिका–८ चोहर्वामा स्थानीयले प्रदर्शन गरेका छन्। घटनाको निष्पक्ष छानबिनको माग गर्दै प्रदर्शनकारीले पूर्व–पश्चिम राजमार्ग अवरुद्ध पारेका हुन्।
प्रदर्शनकारीले प्रधानमन्त्री र गृहमन्त्रीको राजीनामा माग गरेका छन्। उनीहरूले सरकारले युवाको हत्या गरेको आरोप लगाउँदै गोली चलाउनेमाथि कारबाही र प्रहरी दमन बन्द गर्नुपर्ने माग राखेका छन्। जिल्ला प्रहरी कार्यालय सिरहाका प्रहरी उपरीक्षक (एसपी) बासुदेव पाठकका अनुसार धनगढीमाई नगरपालिकाको कसहामा पनि स्थानीयले बाटो अवरुद्ध गरेका थिए।
आन्दोलनकारीले करिब आधा घण्टा सडक अवरुद्ध गरेपछि छलफलपश्चात् सडक सञ्चालनमा आएको प्रहरीले जनाएको छ। देवानगञ्ज–३ मा दुई समूहबीच झडप नियन्त्रण गर्ने क्रममा प्रहरीको गोली लागि मेहताको मृत्यु भएको थियो। सोही घटनाको विरोधमा सुनसरीसहित विभिन्न ठाउँमा प्रदर्शन भएको हो।
सिरहा प्रहरीले राजमार्गका विभिन्न ठाउँमा प्रहरी परिचालन गरी सवारी साधनमा तोडफोड हुन नदिने व्यवस्था मिलाएको छ। साउन १० गते राति देवानगञ्ज–३ कप्तानगञ्जमा हिन्दु र मुस्लिम समुदायबीच झडप हुँदा मेहताको मृत्यु भएको थियो। सोही घटनाको विरोधमा हिन्दुवादीले सिरहाको कसाहास्थित पूर्व–पश्चिम राजमार्ग अवरुद्ध पारेका थिए।
केन्द्रीय सुरक्षा समितिले सुनसरी घटनाको असर अन्यत्र फैलिन नदिन पूर्व सतर्कता अपनाउने निर्णय गरेको थियो। झडपमा इन्स्पेक्टर राकेश राईसहित १० जना र सशस्त्रका १० जना सुरक्षाकर्मी घाइते भएका थिए। दुई जना स्थानीयको अवस्था गम्भीर छ। जिल्ला प्रशासन कार्यालय मोरङले मेला, महोत्सव, विवाह, पार्टी, उत्सव, चार्डपर्व, धार्मिक कार्यक्रम, पुराण लगायतका कार्यक्रममा डिजे बजाउन प्रतिबन्ध लगाएको छ।
