सशस्त्र प्रहरी बलका ८ गणका गणपतिहरूको एकवर्षे कार्यकाल सकिएर नेतृत्वविहीन बनेको अवस्थामा सुनसरीको देवानगञ्जमा दुई समुदायबीच हिंसात्मक झडप भयो। झडपमा एक सर्वसाधारणको मृत्यु भयो। १३ सुरक्षाकर्मीसहित २२ जना घाइते भए।
माथिल्लो तहको सरुवा र नेतृत्व व्यवस्थापनमा भएको ढिलाइले फिल्डको शान्ति-सुरक्षा कमान्डमा असर पारेको छ। सशस्त्र प्रहरी नियमावली अनुसार एसपी (गणपति) सरुवाको अधिकार महानिरीक्षकलाई छ। तर, गृहमन्त्री र संगठन प्रमुखबीचको समन्वय अभावले असार मसान्तमा कार्यकाल सकिएका गणपतिहरूको सरुवा रोकियो।
यही प्रशासनिक ढिलासुस्ती र कार्यस्थलमा स्पष्ट कमान्डर नभएको मौकामा आइतबार राति सुनसरीको कप्तानगञ्जमा बोलबमको डिजे विवादले उग्र रूप लियो। जिल्ला प्रहरी कार्यालय सुनसरीका अनुसार राति हिन्दु धर्मावलम्बीहरू डिजे बजाउँदै जाँदा अर्को समुदायसँग विवाद भएको थियो।
स्थानीय स्तरमा अनुभवी र आधिकारिक कमान्डर नहुँदा प्रहरी चौकीको सानो टोलीले नियन्त्रण गर्न सकेन। दुवै पक्ष चिर्पट, ढुंगा, लाठी र भाला बोकेर सडकमा उत्रिए। स्थिति नियन्त्रणा बाहिर पुग्यो।
मैदानमा खटिएका सुरक्षाकर्मीबीच पूर्वतयारी र समन्वय अभाव देखियो। झडपमा इलाका प्रहरी कार्यालय देवानगञ्जका प्रहरी निरीक्षक राकेश राईसहित ८ नेपाल प्रहरी र ५ सशस्त्र प्रहरी घाइते भए। प्रहरी निरीक्षक राईको पेस्तोलबाट ३ राउन्ड हवाई फायर भए पनि स्थिति साम्य भएन।
स्पष्ट माथिल्लो आदेश र परिपक्व कमान्डबिनै सशस्त्र प्रहरीले गोली चलायो। गोली लागेर देवानगञ्ज–४ का ३० वर्षीय ओमप्रकाश मेहताको मृत्यु भयो। प्रहरी स्रोतका अनुसार सशस्त्र प्रहरी मुख्यालयमा गणपतिको कार्यसम्पादन र सरुवालाई लिएर गृहमन्त्री सुधन गुरुङ र महानिरीक्षक नारायणदत्त पौडेलबीच मतभेद छ। सीमा र संवेदनशील क्षेत्रका गण नेतृत्वविहीन वा अन्योलमा छन्।
स्थानीय र राजनीतिक प्रतिनिधिले भीड नियन्त्रणका न्यूनतम उपाय अवलम्बन नगरी सीधै घातक बल प्रयोग भएको आरोप लगाए। घटनापछि कोशी प्रदेश प्रहरी गण र जिल्लाका वृत्तबाट ३७६ जना अतिरिक्त सुरक्षाकर्मी परिचालन गरियो। देवानगञ्ज र हरिनगरका केही क्षेत्रमा कर्फ्यु आदेश जारी गरियो।
सुरक्षा निकायको माथिल्लो नेतृत्व र कमान्ड शृङ्खलामा सुस्तताले सामान्य विवादले साम्प्रदायिक हिंसाको रूप लियो। सुरक्षा संयन्त्रको कार्यशैलीमाथि गम्भीर प्रश्न उठेको छ। राष्ट्रिय स्वतन्त्र पार्टी (रास्वपा) का सांसद लालविक्रम थापाले भीड नियन्त्रणका नाममा सुरक्षाकर्मीले सर्वसाधारणमाथि अत्यधिक र घातक बल प्रयोग गरेको आरोप लगाए। उनले सरकारको असफलता ढाकछोप गर्न घटनालाई धार्मिक रंग दिन खोजिएको आशङ्का व्यक्त गरे। प्रशासनलाई थप हिंसा रोक्न संयमता अपनाउन आग्रह गरे।
