काठमाडौंको तारकेश्वर नगरपालिका–१ स्थित कालेबासे चुनीदेवी बालुवा प्रशोधन केन्द्र नजिक पार्किङ गरिएको बीएई ०४१० नम्बरको विद्युतीय कारभित्र शनिबार दिउँसो ४५ वर्षीया रश्मी रिजालको जलेको शव फेला परेको छ। प्रहरीले घटनाको अनुसन्धान सुरु गरेको छ।
रिजाल तारकेश्वर–९ शुभकामना चोककी बासिन्दा हुन्। उनी साउन ८ गतेदेखि सम्पर्कविहीन थिइन्। शनिबार दिउँसो कारको पछाडिको सिटमा जलेको अवस्थामा उनको शव भेटिएको जिल्ला प्रहरी परिसर काठमाडौंले जनाएको छ।
घटनास्थलमा प्रहरी टोली पुगेर अनुसन्धान गरिरहेको छ। मृत्युको कारण र घटनाको प्रकृतिबारे यकिन गर्न थप अनुसन्धान आवश्यक रहेको प्रहरीको भनाइ छ। शव परीक्षणका लागि शिक्षण अस्पताल महाराजगञ्ज पठाइएको छ।
रिजाल नक्सालस्थित सानिमा क्यापिटल लिमिटेडमा ‘मर्चेन्ट हेड’का पदमा कार्यरत थिइन्। पारिवारिक स्रोतका अनुसार उनी साउन ८ गते बिहान ७ बजेदेखि नै बेपत्ता भएकी थिइन्।
